O Concello de Cervo celebra o Entroido 2021 con concursos de larpeiradas, máscaras e disfraces. En todos se participará desde a casa.

Desde o Concello de Cervo sinalan que “todos sabemos que este Entroido que está ás portas vai ter que ser, pola actual situación sanitaria, ben diferente. Pero iso non quere dicir que o espírito de Don Carnal non vaia estar presente!!”.

O sábado, 13 de febreiro, haberá un concurso de larpeiradas de Entroido. O domingo 14, día de San Valentín, desenvolverase o concurso ¿qué é o amor para ti?. O 15 de febreiro haberá un concurso de máscaras e o 16 (Martes de Carnaval) terá lugar un concurso para elixir ao mellor disfrace. 

Desde o Concello cervense animan a participar nestas citas: “fainos chegar as túas creacións antes das 17:00 horas do día en que está programada cada unha das actividades a dinamizacion@concellodecervo.com”.