O encoro de Río Cobo acollerá este domingo, día 27 de xullo, a terceira regata da Copa Deputación de Piragüismo, organizada polo Club Deportivo San Ciprián coa colaboración do Concello de Cervo.
Na proba daranse cita, en representación da Mariña, e ademais da entidade anfitrioa, o Club de Piragüismo Altruán, de Ribadeo; o Kayak de Foz; e o club de piragüismo Urban Hotel Viveiro; ademais do Club de Piragüismo Cidade de Lugo e o Club Fluvial de Lugo.
A alcaldesa de Cervo, Dolores García Caramés, desexoulles moita sorte a todos os deportistas, que competirán nas categorías prebenxamín, benxamín, alevín, infantil, cadete e xuvenil nas modalidades K1 e C1, e especialmente aos representantes do Club Local; e animou a todos os visitantes “a que gocen da competición e da contorna excepcional na que se desenvolve para desfrutar dun día de competición, natureza e deporte ao aire libre, toda unha oportunidade para desfrutar dun espectáculo deportivo de alto nivel nun contorno natural privilexiado”.
O Concello de Cervo destaca que “a celebración desta regata supón pois un recoñecemento á excelente localización e condicións do encoro de Río Cobo, consolidándoo como un espazo ideal para o desenvolvemento desta disciplina”.