O concello de Cervo será de novo este venres, día 11 de abril, escenario dunha proba de atletismo do Programa Xogade da Xunta de Galicia, recuperando así a sesión que fora suspendida o pasado 22 de marzo polas inclemencias do tempo. As pistas da Veiga acollerán desde as 17:00 horas esta iniciativa promovida pola Xunta de Galicia, nas categorías Benxamín, Alevín e Infantil. As seguintes citas do calendario serán o 25 de abril e o 9 de maio, anuncia o Concello de Cervo.
Xogade é un programa nado na tempada 2009/10 para dar resposta ao Plan Galicia Saudable da Xunta de Galicia, en colaboración coas federacións e agrupacións deportivas escolares galegas. Máis do 50 por cento dos/as escolares galegos/as de entre 6 e 16 anos gozan da experiencia Xogade, chegando a preto de 150.000 nas últimas tempadas. Este programa ten como iniciativa levar a actividade a todos os concellos galegos, mentres brinda a todos/as os/as escolares galegos/as a posibilidade de practicar e competir con outros colexios e clubs, explica o Concello de Cervo.