Este próximo venres, día 26 de xuño, ás 20:30 horas terá lugar o debut en Galicia do dúo Ébano Acústico no Círculo Habanero da Devesa (Ribadeo). O prezo da entrada é de 10 euros.
É unha actividade organizada pola Asociación Cultural a Tribo da Taavesía, que anuncia: “Ébano Acústico é un dúo musical formado pola cantante afroamericana Ebony Joy Phillips e o guitarrista estadounidense-español Alex Fernández. Neste ano 2026 decidiron trasladarse a Galicia tras investigar online o panorama musical galego de rock, blues e jazz e lanzar aquí un proxecto en formato dúo acústico. Phillips é unha cantante dinámica en varios estilos e Fernández, aparte da guitarra, toca batería e baixo con moi bo nivel e tamén é enxeñeiro de audio e produtor con décadas de experiencia profesional. O seu dúo acústico é un formato minimalista: reducidos a voz e guitarra, atópanse na situación musical máis transparente e íntima posible. Unha experiencia pola que o público pode recibir a potencia e a profundidade da música afroamericana do século XX reducida á súa esencia”.