A asociación Mariña Patrimonio continúa co seu programa de actividades cunha nova conferencia dedicada á historia de Sargadelos, “un dos espazos industriais e culturais máis significativos de Galicia”. A charla terá lugar o martes 12 de maio ás 19:00 horas na sala de actos da Casa da Administración, no Museo Histórico de Sargadelos. Baixo o título Do marqués ao arcebispo: mitos e realidades na historia de Sargadelos, intervirá Xoán Carmona Badía, catedrático de Historia e Institucións Económicas na Universidade de Santiago de Compostela e investigador especializado en temas relacionados coa historia da industria.
Mariña Patrimonio anuncia que “nesta conferencia abordaranse diferentes aspectos da historia de Sargadelos, desde a figura do marqués ata outras interpretacións e relatos que foron construíndo a memoria deste lugar. A intervención permitirá achegarse con rigor histórico a un espazo fundamental para comprender a tradición industrial, cultural e patrimonial da Mariña”.
Desde Mariña Patrimonio anímase a todas as persoas interesadas na historia, no patrimonio e na memoria de Sargadelos a asistir a esta actividade, aberta ao público ata completar aforo.