O Seminario de Estudos do Valadouro (SEVA) organiza un evento en memoria do actor e dramaturgo Manuel Lourenzo, recentemente falecido. Será este sábado, día 23 de agosto, ás 20:00 horas no salón de actos da Casa da Cultura Manuel Lourenzo do Valadouro.
Nesta actividade, titulada Acto de gratitude a Manuel Lourenzo, haberá un relatorio de Xesús Pisón; lecturas dramatizadas a cargo de Santiago Fernández, Inma Orol, Daniel Otero, Sabela Quirós, Helena Cornide e Moncho da Lomba; e actuacións musicais de Miro Casabella, Ugia Pedreira e Mano Panforreteiro.
Ademais o Seminario de Estudos do Valadouro vai enviar nos próximos días ás bibliotecas municipais da Mariña e ás asociacións culturais, así como a outros organismos e institucións galegas, a colección de Cadernos que leva publicados desde a súa creación no ano 2013.
O SEVA explica que “o presente comunicado realízase para informar á poboación xeral de que terá ao seu dispor a lectura das nosas publicacións. A colección de Cadernos do SEVA está composta, de momento, por 16 números, aínda que os destinatarios só recibirán 14, xa que dous deles están esgotados e pendentes de reedición. O envío dos Cadernos ten como obxectivo dar a coñecer os traballos de investigación e creación que o SEVA leva promovendo desde o ano antedito. Da mesma maneira enviará os traballos que se publiquen no futuro”.