Muras celebrará o 27 de setembro unha nova edición da Feira do Poldro e do gando do monte, co apoio da área de Rural da Vicepresidencia da Deputación de Lugo.
O deputado provincial de Rural, Daniel García; o alcalde de Muras, Manuel Requeijo; a tenente de alcalde, Paula Gómez; acompañadas pola presidenta da Asociación de Mulleres Rurais de Muras, Fina Carballido, e de Carlos Fernández, gandeiro de Puraga, presentaron o programa da feira, que cumpre trinta e oito edicións.
A Vicepresidencia da Deputación de Lugo explica que “ganderías das comarcas da Mariña e da Terra Chá e do resto do país traen os animais -gando cabalar e bovino- á feira do Alto da Gañidoira, que é un punto de compra e venda e tamén de encontro para o sector. Arredor da feira, que abrirá ás 10.00 horas, desenvolveranse diferentes actividades de posta en valor da tradición gandeira e de promoción da carne de poldro. Entre elas, un certame morfolóxico de Puraga, carreiras de andadura, un xincana de barrís da man da Asociación Atila e unha degustación de hamburguesas de carne de poldro de Pura Raza Galega. Na contorno da feira, poderá verse tamén unha demostración en vivo de talla de madeira e unha exhibición de escultura en madeira con motoserra. Ademais, a Asociación de Mulleres Rurais de Muras organiza unha exposición das pezas que elaboran no curso de talla que fan durante o ano. A cativada poderá participar en bautismos hípicos e asistir a unha charla divulgativa sobre o mundo do cabalo”.
E destaca que “unha das novidades desta edición é a exposición A memoria da feira, na que se mostrará a traxectoria desta cita gandeira a través dos seus cartaces. Poderá verse na carpa, onde se instalará tamén un posto informativo do proxecto Marca Muras, que o Concello está a desenvolver coa colaboración da área de Rural e da Universidade de Santiago de Compostela para valorizar os produtos de calidade que se producen en Muras”.
Daniel García reafirmou o compromiso da Vicepresidencia da Deputación coa Feira do Poldro de Muras, “un espello no que se miran outras feiras cabalares ou de gando da provincia e do país” e coas políticas que o goberno municipal “está a desenvolver para apoiar a actividade produtiva vinculada ao territorio con iniciativas como o proxecto Marca Muras, para valorizar todos os produtos de calidade que se producen en Muras”.
O responsable provincial valorou a feira como “unha plataforma para recoñecer e trasladar ao conxunto da sociedade o valor ambiental, social e cultural da gandería e dos sistemas tradicionais de cría no monte”
A tenente de alcalde e coordinadora da feira, Paula Gómez, destacou “a participación activa da Asociación Atila, cunha xincana de barrís, e da Asociación de Mulleres Rurais de Muras, cunha exposición de pezas en madeira”. Tamén destacou a exposición de carteis históricos, “unha forma de honrar a memoria da feira e das persoas que directa ou indirectamente tiveron e teñen que ver coa feira e especialmente das gandeiras e gandeiros que ademais manteñen vivo o rural”.
As ganderías interesadas en participar no certame de gando poden inscribirse ata o 22 de setembro. Tamén está aberto o prazo para anotarse na carreira de andadura, ata o 21 de setembro.
O venres 25 e o sábado 26 de setembro locais hostaleiros de Muras –Bar Santi e Chiringuito de Muras- ofrecerán degustacións de carne de poldro de Pura Raza Galega a partir das 20.00 horas no marco do programa de promoción de produtos de razas autóctonas Un gusto de rural, un rural degusto.