O Concello de Viveiro anuncia que o luns 3 de agosto abrirase o prazo de inscrición para os nenos e nenas que desexen participar como portadores dos enanitos dos cabezudos durante os tradicionais desfiles das festas patronais.
Os cabezudos sairán polas rúas de Viveiro do 10 ao 15 de agosto, “formando parte dun dos actos máis emblemáticos e agardados das festas de San Roque e Nosa Señora, unha tradición que cada ano reúne a numerosas familias e enche de ambiente o centro histórico da cidade”, explica o Concello de Viveiro, que engade: “a actividade está dirixida a pícaros e pícaras de entre 7 e 12 anos. O prazo de inscrición permanecerá aberto ata completar as prazas dispoñibles. As inscricións poderán realizarse no Teatro Pastor Díaz, en horario de 9:00 a 14:00 horas, tendo preferencia a inscrición presencial. Cada persoa poderá inscribir un máximo de catro nenos ou nenas, e cada participante poderá levar un enanito un único día”.
O Concello de Viveiro anima ás familias a participar “nesta tradición tan querida, que continúa pasando de xeración en xeración e que constitúe unha das imaxes máis representativas das festas patronais da cidade”.