Os actos da Semana Santa de Ribadeo celebraranse desde o 22 ata o 31 de marzo.
Empezarán o día 22, Venres de Dolores, ás 20:00 horas cunha misa solemne na igrexa parroquial de Santa María do Campo.
O sábado 23 ás 20:00 horas haberá a celebración vespertina do Domingo de Ribadeo e ás 20:30 horas terá lugar o pregón a cargo do bispo de Lugo, Alfonso Carrasco Rouco. No acto actuarán a Coral Polifónica de Ribadeo e o Coro Sagrado Corazón.
Para o día 24, Domingo de Ramos, está programada unha procesión desde a igrexa, ás 11:15 horas, e a bendición dos ramos na Praza de Abaixo. E ás 12:00 horas celebrarase a Eucaristía no Domingo de Ramos na Paixón do Señor.
O luns 25 ás 22:00 horas celebrarase o XXV Vía Crucis, que estará presidido polo bispo de Mondoñedo-Ferrol, Fernando García Cadiñanos, e animado polo Coro Parroquial.
O mércores 27 ás 20:45 horas terá lugar na igrexa parroquial ribadense un concerto de música sacra a cargo da Banda Municipal de Música de Ribadeo.
O Xoves Santo, día 28, ás 19:00 horas haberá a celebración da Eucaristía na Cea do Señor, animada polo coro parroquial, e a Procesión dos Pasos da Paixón do Señor, acompañada polo Coro Miserere e polo Grupo de Tambores.
Para o Venres Santo están programados estes actos: ás 10:30 horas terá lugar a procesión con Xesús Nazareno e Bendición ás Clarisas, acompañada polo Coro Miserere e polo Grupo de Tambores, e o tradicional Encontro na Praza de Abaixo; ás 18:00 horas celebrarase a Paixón do Señor, animada polo Coro Parroquial, Desencravo e Procesión do Santo Enterro, acompañada pola Banda Municipal de Música de Ribadeo e o Coro Miserere; e ás 24:00 horas haberá a procesión da Soedade, acompañada polo Coro Miserere.
E o 31 de marzo, Domingo de Pascua, ás 11:00 horas celebrarase a Procesión do Anxo, acompañada polo grupo de gaitas Follas Novas; e ás 12:00 horas haberá a Misa Solemne do Domingo de Pascua da Resurrección do Señor, cantada polo Coro Parroquial.