A Banda de Música Municipal de Ribadeo estreará dúas obras no tradicional concerto Aquí como en Viena, que se celebrará o día 28 deste mes, domingo, ás 20:30 horas no Cine Teatro ribadense con entrada de balde. O director da banda municipal de Ribadeo, David Ballester, explicou que "nestas datas, como sempre, chega o concerto Aquí como en Viena, que xa é un clásico da banda de Ribadeo. A diferenza do ano pasado, que fora un conto no que tocamos todo obras que desembocaban en Viena, nesta ocasión faremos unha pequena festa ao principio, na que haberá invitados internacionais e da nosa terra, e despois desembocaremos, como non pode ser menos, en Viena, coas polcas, valses e demais obras típicas deste concerto".
David Ballester destacou que nesta edición de Aquí como en Viena a Banda de Música Municipal de Ribadeo "estreará dúas obras, unha delas unha polca". E rematou invitando "a toda a xente a que acuda ao Cine Teatro. O ano pasado houbo moita xente e esperamos que este ano sexa igual e que guste o concerto". O cartel anunciador do acto reproduce un debuxo realizado por Sheila Tatiana Carrasco Guzmán, alumna de 5º de Primaria do colexio Gregorio Sanz no curso 2013-14.