O Concello de Alfoz vén de avanzar na posta en valor do seu patrimonio natural e cultural coa execución do proxecto Mellora da sinalización turística do Concello de Alfoz, “financiado ao abeiro da convocatoria 2025 de subvencións a concellos de ata 10.000 habitantes para mellora de infraestruturas turísticas. A actuación conta cun investimento total de 30.007,01 euros, subvencionado ao 100 % pola Axencia Turismo de Galicia, que propuxo a concesión por un importe de 30.000,00 euros”.
O proxecto consistiu na instalación de nova sinalización informativa, patrimonial e de acceso ao municipio, mellorando puntos de entrada e itinerarios de especial interese turístico. As actuacións desenvolvéronse nas parroquias de O Pereiro, Adelán, Carballido, Bacoi, Reirado e Mor.
A alcaldesa de Alfoz, Efigenia Maseda Paz, responsable da área de Turismo, destaca que “este proxecto dá un paso adiante na forma de recibir e acompañar a quen vén a Alfoz. A nova sinalización mellora a experiencia de visita, dá coherencia ao territorio e reforza a identidade das nosas parroquias.”
A rexedora engade que “a sinalización da ruta Pena Abaladoira–Escouridal e da Pesa de Correlos contribúe a un turismo sostible e educativo. Queremos que tanto veciños como visitantes coñezan Alfoz a través dunha información clara, rigorosa e respectuosa co entorno.”
O Concello de Alfoz agradece a colaboración da Axencia Turismo de Galicia e anuncia que continuará traballando en iniciativas que impulsen a promoción turística e o desenvolvemento local.