A Área de Medio Rural da Vicepresidencia da Deputación de Lugo colabora coa Fruga e coa Asociación Galega de Viticultura na organización dun Túnel do Viño Tinto, que se celebrará este venres, día 16 de outubro, en Barreiros. E explica que “a iniciativa busca poñer en valor a diversidade dos viños tintos producidos na provincia e achegar ao público a súa riqueza. O túnel contará cun total de 15 viños, cinco da IXP Terras do Navia, seis da D.O Ribeira Sacra e outros catro que non forman parte de ningunha distinción xeográfica”.
O deputado de Medio Rural, Daniel García, explicou: “queremos reivindicar todo o traballo que hai detrás da produción de viño e o seu potencial para contribuír á conservación do territorio”.
A xornada, que terá lugar no local das Escolas de San Cosme, complétase coa conferencia Tintos de Galiza. Pasado e futuro, a cargo de Miguel Anxo Besada, da Taberna A Curva, na que se abordará a situación dos viños tintos galegos. Tanto a asistencia a conferencia como a cata dos viños é gratuíta.
O programa de actividades comezará ás 11:00 horas cun saúdo institucional; ás 11:30 terá lugar a conferencia de Miguel Anxo Besada; ás 17:30 horas presentarán os viños do túnel Martiño Santos, sumiller de Vide Vide!; ás 18:30 horas haberá proba libre; e a clausura está prevista para ás 19:30 horas.