O Concello de Burela, a través da Biblioteca Pública Municipal, fai públicos os nomes das persoas gañadoras do Concurso de Postais e do Certame de Poesía Infantil Nadal 2025, dúas iniciativas culturais organizadas con motivo das festas do Nadal e dirixidas á infancia e á mocidade do municipio. A entrega de premios de ambos certames terá lugar o mércores 28 de xaneiro ás 19:00 horas na Sala de Arte da Casa da Cultura de Burela.
No Concurso de Postais Nadal 2025 o xurado recoñeceu, na categoría de Educación Infantil, os traballos de Erea Fontenla Suárez, do CEIP Vista Alegre, que obtivo o primeiro premio; Mara Blanco Ramos, do CEIP Cervo, segundo premio; e Icia Arranz Varela, do CEIP Vista Alegre, terceiro premio. Na categoría de 1º e 2º de Primaria resultaron premiadas Naia Fontenla Suárez, do CEIP Vista Alegre, co primeiro premio; Martina Cociña Lestao, do CEIP Os Castros, co segundo; e Manuela Bruno Oliveira, tamén do CEIP Os Castros, co terceiro premio. En 3º e 4º de Primaria o primeiro premio foi para Teo Domínguez García, do CEIP Vista Alegre; o segundo para Alejandro Diéguez Ruiz, do CEIP Fondo Nois; e o terceiro para Helena Turcu, do CEIP Os Castros. Finalmente, na categoría de 5º e 6º de Primaria, o primeiro premio recaeu en Pedro Cociña Lestao, do CEIP Os Castros; o segundo en Elsa Pernas Otero, do mesmo centro; e o terceiro en Milton Gomes Martins, tamén do CEIP Os Castros.
Pola súa banda no Certame de Poesía Infantil Nadal 2025, na categoría A, ata oito anos, o primeiro premio foi para Naia Fontenla Suárez e o segundo para Lidia Ares Fernández, ambas do CEIP Vista Alegre. Na categoría B, de nove a once anos, resultou gañador Teo Domínguez García, mentres que o segundo premio foi para José M.ª García Fra e o terceiro para Sara López Pena, todos eles do CEIP Vista Alegre. Na categoría C, de doce a dezaseis anos, o primeiro premio correspondeu a Jimena García Fra, o segundo a Jaume Fernández López e o terceiro a Carlota Eimil Ramos, alumnado do IES Monte Castelo.
Ademais, os poemas premiados nesta fase local participarán na fase provincial do certame, convocada pola Biblioteca Pública de Lugo co patrocinio da Consellería de Cultura, Lingua e Xuventude da Xunta de Galicia. Os textos galardoados pasarán a ser propiedade da Biblioteca Pública de Lugo, que se reserva o dereito de publicación e incluirá os poemas premiados nun libriño conmemorativo anual.
A concelleira de Cultura, Lina Gómez, felicitou ás persoas premiadas e a todos e todas as participantes, destacando “a creatividade e a calidade dos traballos presentados” e sinalou que “estas iniciativas reforzan o compromiso do Concello de Burela coa promoción da lectura, da escrita e das expresións artísticas dende idades temperás”.