O Concello de Burela anuncia a programación da Casa da Cultura ata final de ano, que comezará este sábado, 29 de novembro, ás 20:00 horas co musical tributo a Queen e Michael Jackson titulado Leyendas. Ademais deste musical de Diverfest eventos, apto para todos os públicos, haberá representacións teatrais, concertos, espectáculos humorísticos e moito máis ata o día 30 de decembro.
A concelleira de Cultura, Lina Gómez, sinala que “a programación cultural deste mes de decembro recolle a esencia do que queremos para Burela: variedade, calidade e propostas pensadas para todas as idades. Rematamos o ano cun calendario que combina teatro, música, danza e actividades para o público infantil, ofrecendo opcións para desfrutar en familia e tamén para o público adulto”.
Gómez subliña que “dende o musical tributo Leyendas ata o tango en directo, o humor de A Presa, o teatro escolar, as propostas para a cativada e incluso Romeo e Xulieta en versión de Prokófiev, buscamos que a nosa Casa da Cultura siga sendo un espazo vivo, diverso e acolledor".
“Animamos a toda a veciñanza a achegarse, participar e facer súa a cultura, porque cada actividade é unha oportunidade máis para construír comunidade", conclúe a concelleira de Cultura.
Tanto Leyendas como o concerto de tango 'Desde el jardín del alma' o 13 de decembro e mais 'Romeo y Julieta de Prokófiev' o 26 de decembro contan con venda anticipada de entradas en liña. Tamén estarán dispoñibles no despacho de entradas no propio día antes do evento.