A asociación Amigos da Maruxaina convoca o concurso para o cartel da festa da Maruxaina 2024, que se celebrará o 10 de agosto en San Cibrao (Cervo).
Poderán participar todas as persoas que o desexen, agás os membros da directiva da Asociación Amigos da Maruxaina. Cada concursante poderá presentar un máximo de dúas obras, sendo condición indispensable que sexan inéditas Deberán incluír o seguinte texto: “MARUXAINA. SAN CIPRIÁN. 10 AGOSTO 2024. DECLARADA DE INTERESE TURÍSTICO GALEGO”. O tamaño do orixinal será A-4 (21 x 29,7 centímetros), sempre en posición vertical, en branco e negro e non hai normas para o tipo de letra empregada.
Os carteis presentaranse en tamaño orixinal, sen firma do autor ou autora, e baixo un lema ou pseudónimo que figurará escrito na parte posterior do cartel, e acompañado dun sobre pechado en cuxo exterior figurará o mesmo lema ou pseudónimo do cartel. Dito sobre conterá os seguintes datos: nome, apelidos, DNI, enderezo, cidade e número de teléfono do autor ou autora. O lugar de entrega das obras será a Casa da Cultura de San Ciprián, situada na Avenida da Mariña, nº 60, en horario de luns a venres de 09:00 a 14:00 horas. A data límite de recepción é o venres 10 de maio de 2024 ás 14:00 horas. Para os carteis que se fagan chegar por servizo de correos a data límite do selo postal será o día sinalado anteriormente (10 de maio de 2024).
O premio é de 150 euros para o cartel gañador, que será a imaxe da festa. Entregarase o venres 9 de agosto de 2024, nun acto presencial en San Ciprián. A asociación poñerase en contacto co gañador ou gañadora inmediatamente despois do fallo do xurado.
O xurado estará composto por 9 persoas, que son as que forman a directiva da Asociación Amigos da Maruxaina.