A XXXIV Copa Deputación de Fútbol Memorial Pedro Tapia celebrará as súas finais de categoría infantil, xuvenil e cadete esta fin de semana nos campos de A Mina (A Pontenova), Viñas da Veiga (Mondoñedo), e Cerdeiriños (Monterroso), respectivamente. O organismo provincial inviste nesta iniciativa 100.000 euros, organizando unha nova edición da Copa coa colaboración da Federación Galega de Fútbol.
Son uns 15.000 euros máis que nas anteriores edicións pois, en resposta as peticións dos clubes, a institución tamén asume os custos de arbitraxes e desprazamentos. Durante a presentación do torneo, realizouse o sorteo de emparellamentos que terán lugar durante os meses de maio e xuño por toda a provincia.
A primeira das finais en disputarse será a de categoría infantil, que se celebrará este sábado ás 11:30 horas no campo de A Mina, en A Pontenova e enfrontará á Sociedade Deportiva Sarriana e á Sociedade Deportiva Ribadeo. Xa pola tarde, ás 18:00 horas terá lugar a final da categoría xuvenil, que medirá á Sociedade Deportiva Porto Burela e á Escola de Fútbol Polvorín, no campo de fútbol de Viñas da Veiga, en Mondoñedo.
O domingo será a quenda dos cadetes, coa celebración da final entre a Sociedade Deportiva Ribadeo e a Sociedade Deportiva e Cultural Residencia A, a partir das 11.30 horas no campo de Cerdeiriños, en Monterroso.
Categorías e premios
Como novidade, este ano a competición deportiva reúne a equipos de todas as categorías a nivel provincial co obxectivo de promover e impulsar o fútbol base lucense. Para facer máis dinámica a Copa Deputación de Fútbol, o sistema de competición será a partido único ata a final. Ademais, a final das categorías Preferente Autonómica e Primeira Autonómica masculina celebraranse o 25 de xuño no Estadio Anxo Carro do Club Deportivo Lugo. A cada un dos finalistas das categorías de fútbol base corresponderalle trofeos e medallas que serán aportados pola Deputación.
- Preferente Autonómica e Primeira Autonómica masculina: 1º clasificado 5.000 euros e 2º clasificado 3.000 euros.
- Segunda e Terceira Autonómica Masculina: 1º clasificado 4.000 euros e 2º clasificado 2.000 euros.
- Segunda división feminina, Primeira división feminina e Segunda división feminina grupo primeiro: 1º clasificado 4.000 euros, 2º clasificado 2.000 euros e 3º clasificado 500 euros.