A Pontenova
O grupo teatral Improdutivas actuará este sábado, día 8 de outubro, na Pontenova. Representará a obra titulada Improducións na Casa da Cultura ás 18:00 horas.
“Chega a A Pontenova unha tarde chea de risas e improvisación! Dentro do Ciclo de Teatro Amador o grupo Improdutivas presenta a súa función máis tola e divertida: Improducións, unha obra completamente improvisada onde todo pode pasar”, anuncia o Concello da Pontenova, que engade: “un espectáculo para todas as idades, cargado de humor, creatividade e participación do público”.
É unha actividade organizada pola ANPA do CEIP A Pontenova coa colaboración da Deputación de Lugo e do Concello da Pontenova.
A asociación de veciños San Pedro da Ribeira, de Saldoira (A Pontenova), organiza un magosto para este sábado, día 8 de novembro, desde as 14:00 horas.
Haberá empanada, costela ó forno, sobremesa, castañas, café, chupito e queimada popular.
Para participar nesta actividade hai que anotarse previamente e o prazo remata este mércores, 5 de novembro.
Dentro do programa Lambiscadas Científicas, o centro social Blanca Muruais, de Saldoira (A Pontenova), acollerá unha charla titulada Enfermidades transmitidas por carrachas: coñecelas para poder previlas. Será este venres, día 31 de outubro 20:00 horas.
É unha actividade organizada pola Asociación de Veciños San Pedro da Ribeira.
Ubú Teatro presentará na Pontenova a obra titulada Mudanzas, dirixida por José Campanari. Será este sábado, día 18 de outubro, ás 19:00 horas no salón de actos Casa da Cultura.
É unha actividade organizada pola Asociación Teatral Lume Escénico da Pontenova coa colaboración do Concello e da Área de Cultura da Vicepresidencia da Deputación de Lugo.
O club de lectura Os Fornos retomará as súas actividades, coa primeira reunión do curso 2025-2026, o día 16 de outubro, xoves, ás 20:00 horas na biblioteca municipal da Pontenova, que está no primeiro andar da Casa da Cultura.
Para máis información sobre esta iniciativa as persoas interesadas poden dirixirse á Oficina de Información Turística do Concello da Pontenova.
A Casa da Cultura da Pontenova acollerá unha charla sobre como vender a través de WhatsApp. Será o día 7 de outubro, martes, de 19:00 a 21:00 horas.
O Concello da Pontenova anuncia: “atención emprendedores e autónomos da Pontenova! Queres aprender a vender de maneira doada, rápida e segura a través de WhatsApp? Convidámoste á charla de balde Vender a través de WhatsApp seguro, onde descubrirás como aproveitar esta ferramenta para facer medrar o teu negocio sen riscos. Non perdas esta oportunidade para impulsar as túas vendas e protexer o teu emprendemento. Charla gratuíta organizada polo GDR3. Non perdas esta oportunidade!”
A Pontenova celebrará as súas festas patronais desde o venres 3 ata o luns 6 de outubro.
As actividades comezarán o venres cunha verbena amenizada polo grupo Fénix e os DJs Bombardero e Pedro Brmudz.
O sábado haberá sesión vermú, pasacalles e verbena con Solara, A Chocolateira e DJ Bombardero. E ás 00:30 horas farase a XXVII Queima dos Fornos.
Para o domingo está programada sesión vermú, pasacalles e verbena cunha banda de música, EGS el gran showman, Costa Dorada e DJ Pedro Brmudz.
E o luns haberá sesión vermú co dúo Belinda.
A escritora Xulia Marqués Valea presenta na Pontenova o seu libro titulado Para que non estiñe a memoria das avoas. Perfecta Ogaza Fontangordo. Será este sábado, día 27 de setembro, ás 12:00 horas no Auditorio da Casa da Cultura do Concello da Pontenova. Con entrada libre.
No acto de presentación intervirán: Darío Campos, alcalde da Pontenova; Valentín García, secretario xeral da Lingua da Xunta de Galicia; Belén Castro, profesora da USC e exvicedecana da Facultade de Ciencias da Educación de Santiago de Compostela; e a autora do libro. O acompañamento musical correrá a cargo da agrupación folclórica Colexiata do Sar, de Santiago de Compostela.
Ao rematar o acto haberá un xantar en honra de Perfecta Ogaza Fontangordo (Pichula), no local das asociacións desde as 14:30 horas.
A Asociación Cultural e Deportiva As Minas, da Pontenova, ofrece clases de batucada a partir de outubro. Para participar hai que inscribirse e o prazo remata este xoves, 25 de setembro.
A organización explica que esta actividade é para todas as idades e non é necesaria experiencia previa. Tamén anuncian que as persoas interesadas poderán participar nun día gratuíto de proba o sábado 4 de outubro pola mañá.
Para inscribirse e máis información o teléfono de contacto é o 626.098.702.
Villaemil, no municipio da Pontenova, celebra as festas na honra a San Miguel esta fin de semana, desde o venres 26 ata o domingo 28 de setembro.
As actividades comezarán o venres con verbena amenizada polo dúo Belinda e o DJ Pedro Bermúdez.
O sábado a partir das 14:00 horas haberá sesión vermú co grupo Alma Latina, que tamén actuará na verbena xunto ao dúo Acheriza2.
E o domingo ás 14:00 horas celebrarase misa solemne e despois haberá sesión vermú amenizada polo dúo Acheriza2.