Viveiro acolle do 12 ao 21 de agosto a Feira de Artesanía. Será nos Xardíns Noriega Varela.

O Concello de Viveiro acolleu a presentación da XXXVIII Feira de Artesanía, que se celebrará nos xardíns Noriega Varela entre os días 12 e 21 de agosto.

Despois de dous anos de limitacións pola pandemia, a feira terá este ano 32 stands e a presenza de numerosos profesionais deste eido. 

Como novidade, este ano ademais haberá un stand efémero, no que algúns días haberá artesanos e outros obradoiros ou demostracións do oficio.

“Unha referencia no sector, unha feira que destaca pola calidade e a variedade da artesanía, polo que estou convencida de que será un éxito”, afirmou a alcaldesa de Viveiro, María Loureiro.