Barreiros súmase aos actos de conmemoración do Día Internacional para a eliminación da Violencia de Xénero coa lectura dun manifesto e a estrea da obra de teatro Eterea.

 

O Concello de Barreiros  súmase aos actos de homenaxe que se levarán a cabo o vindeiro martes, 25 de novembro, con motivo da celebración do día internacional para a eliminación da violencia de xénero. Con este motivo, a Concellería de Sanidade e Servizos Sociais e a Concellería de Familia e Muller, en colaboración coa Asociación Vea, organizan dous actos conmemorativos. O primeiro terá lugar o propio martes, 25 de novembro, a partir das 12:00 horas, na praza do Concello. Alí darase lectura a un manifesto en contra da violencia de xénero. O acto concluirá cun minuto de silencio en recordo das persoas falecidas ao longo deste ano, vítimas desta lacra social.

 

 

Posteriormente, xa o día 30 de novembro, levarase a cabo o segundo acto conmemorativo a partir das 18:00 horas no centro sociocultural Manuel Díaz Sampedro. Alí o grupo teatral da Asociación VEA (Vontade, Entrega, Acción) representará a súa obra Eterea. A entrada será gratuíta ata completar aforo.