A Federación de Comercio A Mariña (FCAM) e BeOne asinaron un convenio de colaboración polo que esta empresa estará presente no ciclo de charlas sobre o futuro laboral nesta comarca, que se desenvolverá ao longo do presente curso 2025-2026. A FCAM e BeOne así o plasmaron no documento asinado polo CEO da empresa, Roberto Ramos, e pola presidenta da federación empresarial mariñá, Carmen Cruzado. O acto contou coa presenza de Beatriz Irigoyen, asesora da FCAM.
Cruzado Iglesias tivo palabras de agradecemento: “desde a FCAM queremos agradecerlle o seu apoio económico a BeOne, xa que estará presente como entidade patrocinadora na segunda edición do ciclo sobre O futuro laboral na Mariña. Volveremos así aos centros de FP da comarca para seguir contándolle á mocidade que aquí hai traballos moi dignos en moitos sectores e empresas e que na Mariña hai futuro”.
A presidenta da FCAM anunciou que “esta segunda edición chega con máis novidades, que daremos a coñecer proximamente”. E engadiu: “desexamos que esta colaboración poida ter continuidade no futuro e que sexa moi positiva tanto para a FCAM como para BeOne”.
O CEO de BeOne, Roberto Ramos, dixo: “estamos contentos de sumarnos a este proyecto de la FCAM para apostar y poner en valor los puestos de trabajo en esta comarca, donde somos conocedores de que hay una gran demanda de mano de obra en todos los sectores, que por el momento no se está pudiendo cubrir”.
Para Ramos “es importante contarle a la juventud de A Mariña que aquí se puede trabajar, se puede emprender y se puede vivir en unas muy buenas condiciones”.