A Órrea, no municipio de Riotorto, acollerá o día 3 de xaneiro, sábado, desde as 16:30 horas, actividades dedicadas ao poeta Avelino Díaz.
A Asociación Avelino Díaz anuncia que, para rematar as actividades programadas ao redor dos 128 anos do nacemento de Avelino, organiza para o día 3 de xaneiro un acto na Órrea. E explican: “con el pretendemos basicamente dúas cousas: recuperar a memoria do movemento agrarista existente na Terra de Miranda a principios do século pasado, do que nos ilustrará o profesor Hervés cunha conferencia no Local Social da Asociación de Veciños da Órrea; e reconciliar as figuras literarias de Manuel María García Castro, poeta da revista El Agricultor, editada en Riotorto nos albores dese século XX e voceira desa organización labrega, e do seu fillo natural, Avelino Díaz, o poeta de Meira, como era coñecido na Arxentina. Ao remate, haberá algo con que mollar a palabra”.