O Centro Comercial Histórico de Viveiro pon en marcha dende este xoves 27 ata o sábado 29 de novembro a campaña co lema O Mellor Black sin esperas nin sorpresas, mercas e xa o levas, unha fin de semana de compras ofrecendo “fantásticos descontos en miles de artigos”.
“Serán 36 negocios facendo super descontos e promocións. Participan tanto comercios como servizos: hai dende tendas de roupa, calzado, complementos, deportes, moda de nenos, lencerías, mercerías, ópticas, mobles e decoración, xoierías e salóns de peiteado. Un amplo abanico de negocios e sectores que fan que esta campaña sexa moi atractiva para mercar no comercio local”, anuncia o CCH de Viveiro, que engade: “unha oportunidade de vir a Viveiro a mercar, dando un paseo polas rúas do casco histórico, desfrutando das compras ó aire libre, parando a tomar un café ou un viño acompañado dun pincho na hostalaría da vila, desfrutar do ambiente do Black ca música nas rúas (que a teremos a través do fío musical) e levar as compras para a casa sen sufrir problemas de abastecemento ou entregas tardías...Isto é comercio local”.
O CCH de Viveiro destaca que é “unha excelente oportunidade para pasar a fin de semana facendo compras nos 35 comercios participantes na campaña e desfrutar de multitude de descontos en miles de artigos. Os descontos irán dende o 20% ata o 70% nalgúns casos”.
Os locais participantes estarán identificados cós distintivos da campaña, banderolas de cor negra de 2,60 metros de altura colocadas nas entradas dos comercios; “deste xeito para o cliente é moi sinxelo identificar aqueles locais nos que poderá desfrutar da campaña de descontos”.
O Centro Comercial Histórico de Viveiro remata salientando que “é moi importante lembrar que estes descontos non son acumulables a outras ofertas que xa teñan nos comercios, a encargos ou a devolucións, xa que é unha campaña puntual organizada só para as vendas destes días”.
Esta campaña está cofinanciada pola Xunta de Galicia, dentro das axudas para a dinamización de Centros Comerciais Abertos de Galicia.