O Concello de Burela anuncia que o vindeiro martes, día 17 de xuño, as súas maxestades os Reis de España, Felipe e Letizia, visitarán Burela “nun acto vencellado á pesca, ao que o mar nos dá, ao que somos. Trátase dunha visita de especial simbolismo para a nosa vila, estreitamente ligada ao mar, á súa cultura, economía e identidade”.
“A presenza da Casa Real supón un recoñecemento a Burela como un dos centros pesqueiros máis importantes do país, cun porto que leva décadas apostando pola calidade, a modernización e a competitividade, e cunha lonxa que se ten consolidado como referente no sector. Burela medrou grazas ao sector do mar. Máis de cen anos de historia, traballo e sacrificio dan sentido a unha identidade que nos une. Porque Burela é mar. Sempre foi. Sempre será. O martes 17 será un día importante para Burela. Un día para dicir con orgullo o que somos”, explica o Concello de Burela.
O Concello de Burela agradece esta visita como un xesto de apoio institucional e un impulso para seguir defendendo a pesca como motor económico, social e cultural do noso territorio.