O primeiro torneo de baloncesto Celtas Praias de Foz disputarase o vindeiro 7 de setembro, martes, no Pavillón Torques de Marzán ás 20 horas entre o Club Baloncesto Breogán e o Oviedo Club Baloncesto.
A creación deste torneo parte da Concellería de Xuventude e Deportes, que dirixe Gema Méndez, quen destacou na presentación deste evento deportivo “a importancia deste deporte en Foz e a importante labor social e deportiva desenvolvida durante varias décadas polo Club Celtas Foz, que neste ano e medio de pandemia pasouno moi mal, tendo que interromper a súa actividade. Por iso queremos que o baloncesto volva con forza a Foz, e non podía ser de mellor forma que con dous grandes clubs coma o Breogán e o Oviedo, que casualmente teñen como directores deportivos a dúas persoas que formaron parte do Celtas, como son Tito Díaz e Héctor Galán, que nos acompañan hoxe”.
Dario Romero e Adrián Suárez, do Celtas, amosaron a súa satisfacción por poder poñer en marcha este evento “de suma importancia para a localidade e para todas as afeccionadas e afeccionados ao basket”.
As entradas estarán á venda o vindeiro venres, 3 de setembro, en Megabyte, comercio colaborador cos Celtas. O aforo será limitado, ao amparo da normativa Covid.