O Concello de Cervo ofrece actividades telemáticas para o alumnado das escolas deportivas municipais.

O Concello de Cervo ofrece actividades por vía telemática para o alumnado das escolas deportivas municipais, tanto as infantís como as de adultos.

O concelleiro de Deportes, David Rodríguez, anuncia que ante as novas medidas de prevención fronte ao COVID-19, que tan só permiten a realización de deporte individual ao aire libre e sempre usando máscara, permanecen pechados/as: a piscina municipal (salvo no caso excepcional do alumnado do Ciclo de Grao Superior en Ensinanza e Animación Sociodeportiva, cuxa formación práctica require do uso desta instalación), o ximnasio municipal e o Complexo Deportivo da Veiga.

Nas escolas deportivas infantís quedan suspendidas as clases presenciais, pero ofertaranse actividades dirixidas por vía telemática para que os pequenos poidan seguir facendo exercicio desde a casa. E no caso das escolas deportivas de adultos quedan suspendidas as clases presenciais, pero ofreceranse sesións de pilates, zumba e ximnasia de mantemento a través dunha plataforma virtual  para que as persoas usuarias poidan seguir coa súa rutina desde a casa cos seus monitores.

Mentres se manteña esta situación o Concello de Cervo non emitirá ningún recibo ás persoas usuarias destes servizos e instalacións municipais.

Ante calquera dúbida os interesados poden contactar a través do teléfono 982.55.77.77 en horario de mañá.