O Concello de Xove, a través do departamento de Investigación Social do Concello de Xove, elaborou o libro “Baleeira de Morás” dentro do proxecto Xove Mirando ao Mar.
Ata o mes de agosto de 2015 atopábanse no noso concello os edificios que formaron parte da antiga factoría baleeira de Morás, que estivo en funcionamento entre os anos 1965 6 1977.
Este libro é unha guía, unha aproximación á historia da caza dos cetáceos, onde se explica como rematou en Morás o último vestixio industrial baleeiro do Cantábrico e analiza o seu impacto industrial na zona, as relacións laborais e as condicións das primeiras traballadoras asalariadas desta empresa no noso municipio. Así como unha análise da biodiversidade e a conservación dos cetáceos. O libro recolle unha ampla reportaxe fotográfica de veciños e veciñas de Xove que traballaron na factoría e cuxo testemuño serviu para elaborar o seu contido.
Este volume foi financiado polo GALP A Mariña-Ortegal e contou para a súa realización coa colaboración do CEMMA Coordinadora para o Estudo dos Mamíferos Mariños e coa coordinación da dirección e a área de didáctica do IES Illa de Sarón de Xove.
O Concello de Xove pon a disposición de cada casa do concello un volume gratuíto que se poderá recoller nas oficinas xerais municipais en horario de atención ao público.