Dez locais hostaleiros de Burela celebran esta fin de semana, do venres 10 ao domingo 12 de outubro, as xornadas gastronómicas da Merluza D& Burela, nas que se poderán degustar diferentes pratos do peixe “máis capital do porto burelense, que o sitúa como principal lonxa de Galicia, España e Europa en pescada do pincho”.
A hostalería de Burela quere potenciar así a súa oferta gastronómica durante as pontes festivas de outubro e decembro, xa que durante a primeira fin de semana de decembro celebrarase un novo Ponte de Peixe de Burela, no que se ofrecerán receitas doutra das principais especies que capturan as frotas do porto de Burela.
Esta campaña realízase en colaboración con Armadores de Burela e a Organización de Produtores Pesqueiros do Porto de Burela, dentro do seu plan de produción e comercialización anual, cofinanciada por Xunta de Galicia e FEMPA, “co obxectivo de contribuír á trazabilidade dos produtos da pesca e ao acceso dos consumidores a información clara e completa”.
Do venres 10 ao domingo 12 de outubro poderán degustarse os seguintes pratos de pescada do pincho: en A Lonxa, Salpicón de Merluza de Burela e Marisco; en A'Mares, Merluza de Burela marinada con limón e laranxa con marmelada de tomate; no Atrezo, Revolto de Merluza de Burela con trigueiros e gulas; no Contraste, Merluza de Burela en salsa de ourizo; en La cocina de la yaya, Merluza de Burela glaseada con alioli sobre leito de parmentiere de piquillo; en L'Urbana, Filloa rechea de Merluza de Burela con lagostinos; no Rompeolas, Merluza de Burela á galega con crema de patacas; no Salitre, Merluza de Burela á brasa con escuma de espinaca, velouté, fiúncho e crocante de alga; no Sargo, Merluza de Burela en salsa de nécora; e na Vinoteca Ril, Albóndegas de Merluza de Burela con gambas.