A décimo terceira edición do festival de música clásica Bal y Gay, que se celebrará do 5 ao 21 de agosto foi presentada este martes en Foz.
O deputado provincial de Recursos Sostibles e alcalde de Foz, Francisco Cajoto Caserío, participou no edificio CENIMA de Foz na presentación da décimo terceira edición do Festival Bal y Gay, “unha cita musical de referencia en toda España, que se celebrará do 5 ao 21 de agosto. A programación inclúe 14 concertos en diferentes escenarios mariñáns e unha actuación do pianista ruso Grigory Sokolov no Auditorio Fuxan Os Ventos de Lugo, un concerto que suporá tanto o regreso do pianista a Galicia tras dúas décadas como a estrea do Festival Bal y Gay na capital da provincia. A institución provincial fai posible este evento a través dun patrocinio económico de 12.000 euros”, anuncia a Deputación de lugo.
Francisco Cajoto recalcou que presentar unha nova edición deste Festival en Foz “ten un significado especial, porque esta cita naceu aquí. O Bal y Gay xerminou en Nois, unha parroquia da nosa costa e hoxe aquel proxecto que comezou con humildade é unha referencia da música clásica en España”. Destacou o alcalde e deputado provincial “o prestixio internacional dun festival que leva a excelencia a escenarios únicos da Mariña e que consegue que miles de persoas escollan esta comarca cada verán tamén pola cultura”. E engadiu: “como alcalde de Foz síntome especialmente orgulloso de formar parte desta historia: o Bal y Gay leva o nome da nosa terra por todo o país”, valorou Cajoto, quen enmarcou a colaboración da Deputación de Lugo “na nosa maneira de entender a cultura: unha cultura que contribúe a que a provincia de Lugo sexa cada vez máis recoñecida pola súa capacidade de ofrecer experiencias únicas”.
Cajoto rematou a súa intervención agradecendo o “enorme traballo da Fundación Bal y Gay, así como das administracións colaboradoras e de todas as persoas que fan posible que este proxecto nos siga sorprendendo. O Bal y Gay demostra que a excelencia tamén ten acento mariñán”.
No acto de presentación desta cita tamén participaron a Directora do Festival Bal y Gay, Alba Rodríguez, o Presidente da Fundación Xesús Bal y Gay, Enrique Rodríguez Baixeras, e a Presidenta da Mancomunidade de Concellos de A Mariña Lucense, Rocío López, entre outras autoridades.
A Deputación de Lugo tamén anuncia que “esta 13ª edición inaugurarase co conxunto vocal Vox Luminis, dirixido por Lionel Meunier, o día 5 de agosto (21.00 horas) na Catedral de Mondoñedo. Posteriormente, o pianista Moisés Sánchez actuará xunto á violinista Ana María Valderrama e ao contrabaixista Pablo Martín Caminero o día 6 (20.30 horas) no Castelo de Castro de Ouro de Alfoz. A continuación, a soprano Auxiliadora Toledano e o pianista Javier Carmena estarán o día 7 (21.00 horas) no Mosteiro de San Salvador de Lourenzá. Pola súa banda, o violista Antoine Tamestit e a violinista Alexandra Preucil protagonizarán o concerto do día 8 (20.30 horas) na Basílica de San Martiño de Foz. O prestixioso pianista Grigory Sokolov concluirá este primeiro bloque do festival o día 9 (19.30 horas) no Auditorio Fuxan os Ventos de Lugo. O segundo tramo comezará coa Real Filharmonía de Galicia, baixo a dirección de César Ramos, o día 13 (21.00 horas) na Igrexa de Santa María del Campo de Ribadeo. A programación proseguirá co tenor Santiago Ballerini, a soprano Berna Perles e o pianista Javier Carmena o día 14 (20.30 horas) no Auditorio Casa da Cultura de Burela. Iria Folgado (oboe e corno inglés), Raquel Areal (violín), Sara Areal (violín), Marta Rodríguez Otero (viola) e Millán Abeledo Malheiro (violonchelo) presentarán outro dos concertos deste ano o día 15 (20.30 horas) no Pazo de Fontao de Foz. Este segundo bloque finalizará co concerto-conferencia dedicado a Marcial do Adalid a cargo de Martín Llade e Clara Corrales (Radio Clásica - RNE) o día 16 (20.00 horas) no Palacio Santa Emilia de Mondoñedo. O último tramo abrirase coa pianista Yulianna Avdeeva o día 17 (20.30 horas) no Auditorio Hernán Naval de Ribadeo. A Ritirata con Josetxu Obregón chegará o día 18 (20.30 horas) ao Teatro Pastor Díaz de Viveiro. A Orquestra Sinfónica do Principado de Asturias, dirixida por Miguel Sepúlveda, actuará o día 19 (21.00 horas) na Catedral de Mondoñedo e KamBrass o día 20 (20.30 horas) no Museo e Fábrica de Sargadelos de Cervo. O barítono Samuel Hasselhorn, acompañado por Daniel Heide (piano), clausurará esta 13ª edición o día 21 (20.30 horas) na Basílica de San Martiño de Foz”.
As persoas interesadas en asistir a algunha destas actuacións poden adquirir as súas entradas en https://festivalbalygay.com/.
E a Xunta de Galicia anuncia que “impulsa un ano máis o festival de música clásica Bal y Gay, que se desenvolverá entre o 5 e o 21 de agosto e inclúe no cartel a algúns dos máis recoñecidos intérpretes do panorama nacional e internacional”.
O delegado territorial da Xunta en Lugo, Alfonso Villares, destacou durante a presentación “o extraordinario nivel da proposta que atrae talento á provincia, descentraliza a cultura e crea novos públicos pola súa capacidade para emocionar”.
O Goberno galego asinou un convenio coa Fundación Xesús Bal y Gay para patrocinar esta décimo terceira edición, “unha das máis ambiciosas da súa traxectoria”.
Villares felicitou ao presidente da entidade, Enrique Rodríguez Baixeras, e á directora do festival, Alba Rodríguez, “polo magnífico traballo e a planificación rigorosa, froito dunha enorme ilusión e dunha aposta decidida pola calidade”.