Mariña Patrimonio organiza este xoves, día 17 de setembro, ás 17.30 horas, unha visita aberta ao castro de Rueta, en Cervo, para dar a coñecer os traballos arqueolóxicos que se están realizando esta semana no xacemento.
A intervención comezou o pasado luns e “permitiu xa poñer ao descuberto estruturas arqueolóxicas. Con todo, os traballos aínda se atopan nunha fase inicial e é demasiado pronto para determinar a natureza, función ou cronoloxía dos restos localizados”, explica Mariña Patrimonio, que engade: “durante a visita o equipo técnico de Tempos Arqueólogos, responsable da execución da sondaxe baixo a dirección do arqueólogo Fran Alonso Toucido, explicará ás persoas asistentes o traballo realizado, a metodoloxía empregada e as estruturas aparecidas ata o momento. Constitúe unha oportunidade excepcional para observar directamente a sondaxe, xa que a intervención rematará o venres co seu tapado, necesario para garantir a conservación dos restos”.
A organización da visita destaca que “a sondaxe foi promovida por Mariña Patrimonio e realízase grazas a unha subvención da Área de Cultura da Vicepresidencia da Deputación de Lugo. O Concello de Cervo colabora tamén na conservación do xacemento mediante o financiamento da limpeza e roza que se realiza anualmente no castro. A intervención dá continuidade ao estudo arqueolóxico de mínima invasión desenvolvido en 2022 por un equipo coordinado desde o Instituto de Ciencias do Patrimonio (INCIPIT-CSIC), coa participación do Instituto de Arqueoloxía de Mérida (IAM-CSIC)”.
A actividade está aberta a todas as persoas interesadas.
E o Concello de Cervo anuncia que apoia a intervención arqueolóxica que se está a desenvolver estes días no castro de Rueta, “unha actuación impulsada pola asociación Mariña Patrimonio e executada pola empresa Tempos Arqueólogos, coa colaboración económica tamén da Área de Cultura e da Vicepresidencia da Deputación de Lugo, que ten como obxectivo avanzar no coñecemento e estudo deste importante xacemento arqueolóxico do municipio”.
A alcaldesa de Cervo, Dolores García Caramés, visitou os traballos e interesouse polo avance dunha actuación que “permitirá comprobar sobre o terreo os resultados da investigación non invasiva realizada a finais do ano 2022 polo Centro Superior de Investigacións Científicas (CSIC) e o Instituto de Arqueoloxía de Mérida (IAM). Aquel estudo, realizado mediante técnicas de prospección xeofísica como o xeorradar e o magnetómetro, permitiu identificar diferentes anomalías que poderían corresponderse con estruturas arqueolóxicas. Entre os resultados apuntábase á posible existencia de doce cabanas e dúas zonas nas que se terían producido combustións de importancia, así como á hipótese da presenza dalgún tipo de estrutura vinculada a un forno ou sauna castrexa. Os traballos que se están a realizar agora teñen como finalidade comprobar estas hipóteses mediante catas arqueolóxicas e obter novos datos sobre as estruturas e a cronoloxía do xacemento. Segundo avanzan as intervencións, os primeiros resultados están a ser satisfactorios, xa que nas catas realizadas xa apareceron dous muros, un achado que confirma a presenza de estruturas no subsolo e permite continuar avanzando na investigación. A intervención está dirixida polo arqueólogo Francisco Alonso Toucido e prolongarase ao longo desta semana. O equipo está a traballar nunha zona previamente identificada pola prospección xeofísica, onde se localizaran diferentes anomalías susceptibles de corresponderse con estruturas do castro”.
O Concello de Cervo explica tamén que “está a prestar a súa colaboración para facer posible a intervención, especialmente a través dos traballos previos de roza e limpeza da vexetación da contorna do castro, necesarios para acondicionar o espazo e facilitar o desenvolvemento das tarefas arqueolóxicas”.
A alcaldesa, Dolores García Caramés, destacou a importancia de seguir avanzando na investigación e posta en valor do patrimonio arqueolóxico do municipio e puxo especialmente en valor o labor desenvolvido por Mariña Patrimonio: “é unha satisfacción poder colaborar con Mariña Patrimonio e co equipo arqueolóxico nunha actuación que nos permite seguir descubrindo e coñecendo mellor a nosa historia e o noso patrimonio”, sinalou.
García Caramés subliñou: “desde o Concello facilitamos tamén os traballos de roza e limpeza necesarios para preparar a zona e que o equipo puidese desenvolver as catas” e engadiu que “os primeiros resultados son moi interesantes, coa aparición xa de dous muros, polo que agardamos que, a medida que avance a intervención, poidamos seguir obtendo información sobre as estruturas que agocha o castro de Rueta”.
A rexedora municipal agradeceu tamén “o traballo e o compromiso de Mariña Patrimonio coa investigación e divulgación do noso patrimonio”, así como o labor do equipo de Tempos Arqueólogos, destacando que “cada novo achado contribúe a poñer en valor un patrimonio que é de todos e todas e que temos a responsabilidade de conservar e dar a coñecer”.