O Centro Histórico de Viveiro (CCHV) anuncia que ofrece para esta Semana Santa Tapeo de Cuaresma e visitas guiadas: “un ano máis seguimos ampliando a oferta de actividades da Semana Santa de Viveiro. Este ano o Juepeo do xoves 26 de marzo será Tapeo de Cuaresma, unha iniciativa posta en marcha en colaboración ca Xunta de Cofradías da Semana Santa de Viveiro e na que, por suposto, ó ser un tapeo de Cuaresma ningunha tapa leva carne. Este ano volveremos a realizar as visitas guiadas polo Casco Histórico de Viveiro da man do historiador Xesús Martínez, tamén en colaboración ca Xunta de Cofradías de Viveiro. Esta é xa a dezaseisava edición, nada mais nin nada menos que 16 anos organizando estas visitas guiadas nunha das semanas mais importantes do ano na vila. Cabe resaltar o éxito obtido nas pasadas edicións, dende o primeiro ano que se puxeron en marcha, que foi no 2010, a acollida foi moi boa o que fai que se repitan un ano máis. Durante estas datas de afluencia de visitantes a Viveiro parécenos moi interesante ofrecerlles a posibilidade de coñecer a cidade por medio destas visitas guiadas e de xeito gratuíto”.
O CCHV engade que “o obxectivo é dar a coñecer o noso patrimonio cultural e artístico, non só a visitantes, senón tamén ós lugareños, para os que a maioría das veces o máis cercano é o mais descoñecido. Con esta actividade poténciase o patrimonio material e inmaterial, a historia da nosa vila e como redundou no resto de Galiza. A mellor ventá para dar a coñecer o que somos e de onde vimos, toda a historia que encerran as nosas rúas, calexas, monumentos, arquitectura, ... En definitiva, descubrir os encantos dun dos cascos históricos de máis sona da comarca. As visitas serán da man do viveirense Suso Martínez, historiador e guía de turismo oficial, colaborador en varios medios en asuntos de turismo e historia de Galicia, guía do Concello de A Coruña e guía na Semana Santa de Viveiro dende o 2010. As visitas partirán tódolos días dende a Praza Maior, cada visita é distinta, ningún dia o percorrido é o mesmo, o que as fai moi amenas e interesantes. Dende a Directiva da Asociación de Comerciantes do Centro Histórico de Viveiro queremos agradecer a Suso Martínez que un ano máis acepte ser o guía destas visitas xa consolidadas no tempo e que tanto éxito acadan ano tras ano grazas ó seu bo facer”.
O Centro Comercial Histórico de Viveiro agradece á Xunta de Cofradías “a gran labor que levan a cabo ca organización e promoción da Semana Santa de Viveiro que tan importante é para todos o viveirenses, e a satisfacción que é para nos poder colaborar con eles na organización destas actividades”. E anuncia que “este ano o comercio de Viveiro abrirá as súas portas o festivo de Xoves Santo en horario de mañá; así se decidiu pola maioría dos negocios. A apertura será de 11 a 14 horas, que é o horario de festivos. Nestas datas de moita afluencia de xente á vila e dous días festivos consecutivos, o comercio abrirá para poder dar servizo comercial tanto á xente da vila como ós visitantes que se achegan estes días a Viveiro”.