A vila de Ribadeo acollerá do 29 de agosto ao 8 de setembro as súas Festas Patronais 2025, once días cheos de música, tradición, deporte e actividades para todas as idades.
O venres 29 de agosto abrirase o programa ás 20:30 horas co pregón a cargo de Pepe Rodil, presentado por Daniel Gayoso, acompañado polo pasarrúas da Sorcha Showband unha hora antes. Xa pola noite, o público poderá gozar dunha festa musical con DJ Manu Méndez, TheSound Project e Litainer a partir das 23:30horas.
O sábado 30 será a quenda do Mercadillo na Praza de Abastos de 12:00 a 18:00 horas e da 3ª edición do Xara Fest, no porto deportivo, con artistas como C. Marí, Lua de Santana, L’Haíne, 9Louro, Betty Bunny, Wachu e Baby Romeo. A apertura de portas será ás 20:00 horas.
O domingo 31 celebrarase o tradicional Día da Bicicleta, con saída diante da Casa do Concello ás 11 da mañá.
O mércores 3 de setembro terá lugar o Día dos Maiores, con visitas ao Centro de Día e á Residencia, acompañados polos Cocos, Cabezudos e o Cuarteto de Gaitas Illa Pancha, ademais dunha chocolatada.
O venres 5 será o Día do Neno, cunha tarde de xogos, inchables e festa da escuma, seguido dunha verbena coas orquestras Finisterre Tropical Tour e Panorama City ás 23:00 horas. Xusto antes, ás 20:00 horas, a charanga Los Támega farán un pasarrúas pola vila.
O sábado 6 haberá sesión vermú co dúo La Hora Bruja despois dun novo pasarrúas de Los Támega, e pola noite, gran verbena con Furia Joven e Tekila a partir das 23:00.
A véspera da Patroa, domingo 7, estará marcada polas bombas de palenque ás 11 da mañá, saída de Cocos e Cabezudos media hora despois, actuación dos Pandereteiros do Inferno ás 12:30 horas, partido de fútbol entre Ribadeo FC e Xove Lago e sesión vermú a cargo de La Bamba ás 14:00 horas. Xa pola noite, verbena con La Bamba e a orquestra Cinema e os fogos artificiais no peirao.
O día grande, luns 8 de setembro, comezará cunhas bombas de palenque ás 11:00 anunciando o día da Patroa. Ribadeo honrará á súa patroa coa misa solemne cantada pola Coral Polifónica de Ribadeo e procesión, seguida dun concerto da Banda Municipal ás 12:00 horas. O día pechará cunha gran verbena coa orquestra Channel, o concerto do grupo Ráfaga e a fin de festa coa mesma orquestra Channel.
Un programa completo que consolida as Festas Patronais de Ribadeo como unha das citas máis destacadas do verán, grazas á organización da Comisión de Festas de Ribadeo, coa colaboración de entidades e patrocinadores locais.