A parroquia de San Adriano, en Lourenzá, prepárase para vivir as súas tradicionais festas na honra a Santa Filomena, que se desenvolverán do 5 ao 7 de setembro cunha programación chea de música, gastronomía e tradición. O campo da festa estará cuberto cunha gran carpa, garantindo o bo desenvolvemento das actividades en todas as xornadas.
O venres, 5 de setembro, a partir das 21:30 horas, comezará a celebración cunha gran pulpada e churrascada servida na mesa pola Pulpería Suso e o Bar Sanbet. A continuación, a música será protagonista cunha gran verbena a cargo das orquestras Solara e Saudade.
O sábado 6 terá lugar a misa solemne ás 13:30 horas, seguida da sesión vermú coa orquestra Costa Dorada. Xa pola noite, a festa continuará cunha gran verbena amenizada polas orquestras Costa Dorada e Magos, que garantirán un ambiente festivo ata altas horas.
E o domingo, 7 de setembro, último día das festas, celebrarase a misa solemne ás 13:30 horas. Durante a sesión vermú actuará o grupo de baile da Asociación Cultural Osorio Gutiérrez de Lourenzá, e a música continuará pola tarde e noite coa orquestra Pontevedra e o dúo Epo-K, que pecharán por todo o alto a programación festiva.