San Cosme de Barreiros celebra as festas na honra ao seu patrón esta fin de semana, desde o venres 26 ata o domingo 28 de setembro.
O Concello de Barreiros anuncia que este venres, 26 de setembro, con motivo da festividade local, as oficinas municipais permanecerán pechadas. E tamén explica que “durante a fin de semana celebraranse as festas patronais de San Cosme, nas cales actuará a Banda de Música de Ribadeo. Esta actuación enmarcase no programa Tradigalu, da Vicepresidencia da Deputación de Lugo. É un programa de difusión e promoción da música tradicional e popular da área de Cultura que financia as actuacións de grupos de música tradicional, bandas e corais, facilitando a presenza da nosa música en celebracións populares e eventos culturais por todo o territorio. Desde o Concello de Barreiros queremos desexarvos unha boa festividade do San Cosme”.
O concerto da Banda de Música de Ribadeo será o venres 26 de setembro ás 20:00 horas na Praza do Concello. E despois, desde as 21:00 horas, haberá unha cea baile e a partir das 23:00 horas, verbena co grupo Fuxsión Latina.
O sábado ás 13:30 horas celebrarase misa e a continuación haberá procesión e sesión vermú cos grupos Fussión e Galicia.
E o domingo rematarán os festexos cunha sesión vermú larga amenizada polo dúo Matices.