San Cosme de Barreiros acollerá este xoves, día 3 de setembro, de 16:00 a 20:00 horas un taller de cociña de temporada e proximidade. Será nas antigas escolas de San Cosme a parte teórica e no CEIP a práctica. É gratuíto e ten límite de prazas. Impartirao Sandra Varela.
O Gdr Terras de Miranda explica que o proxecto de cooperación Comedores Escolares Sustentables, do que forma parte este taller, “é unha iniciativa promovida por cinco Grupos de Desenvolvemento Rural de Galicia (GDR), en colaboración coa Axencia Galega de Desenvolvemento Rural (Agader). Este proxecto trata un tema emerxente da nosa realidade como é a demanda de Comedores escolares sustentables e saudables, que conecta coa preocupación social polas implicacións do sistema alimentario na saúde, a economía e o medio ambiente. Traballase no asesoramento e adaptación dos menús escolares aos requisitos do Real Decreto 315/2025, que establece uns novos criterios para o subministro de alimentos e na programación dos menús escolares. O día 3 de setembro haberá un taller teórico -práctico para elaboración de menús con escandallos dirixido a persoal de cociña, encargados de comedor, ANPAS e dirección dos centros escolares”.