O 27 de novembro chega a Burela "Conexión Pingüín", unha divertida comedia con Luis Iglesia e Marcos Orsi.

O vindeiro sábado, 27 de novembro, chega á Casa da Cultura de Burela Conexión Pingüín, unha divertidísima comedia sobre a incomunicación protagonizada por Luís Iglesia e Marcos Orsi con texto do premiadísimo José Prieto e producida por Culturactiva Producións. Tralo éxito de Sénior, estes dous grandes actores xúntanse de novo para meterse na pel de dous intrépidos montañeiros que tratan de chegar á Antártida.

Conexión Pingüín é unha peza que fala da incomunicación entre os seres humanos, un mal que fai estragos todo os días e a todas horas. Estamos na súper era tecnolóxica, da conexión inmediata, da telecomunicación, mais nunca estivemos tan lonxe entre as persoas. 

Unha reflexión cómica sobre a incomunicación na era da comunicación, nunha posta en escena que mestura neve polar, móbiles de última xeración, pingüíns no horizonte e sobre todo moito humor. Por un lado, os dous protagonistas trasladarán ao público ao ano 1923, cando tivo lugar unha famosa expedición con rumbo ao Polo Sur. Por outro lado, unha conferencia formal que, case un século despois, rememora e actualiza aquela fazaña antártica. O público descubrirá a faceta máis cómica de Marcos Orsi e de Luís Iglesia, un dos actores máis recoñecidos do panorama galego actual. 

A obra, que terá lugar ás 20:30 horas, conta co apoio da AGADIC (Axencia Galega das Industrias Culturais) a través das súas axudas á creación escénica.