Burela
Os Reis Magos farán parte do seu percorrido por Burela o día 5 de xaneiro, luns, en tren.
O Concello de Burela anuncia que desde as 18:30 horas “o tren das súas maxestades irá dende a rúa Camiño Real a avenida Rosalía de Castro, dende onde irán a pé ata a praza da Mariña. Alí haberá chocolatada, rosconada e o gran sorteo de Nadal, con 3.000 euros en vales de compra. Mil grazas á Sociedad Cultural Recreativa Ledicia e a ACIA Burela polo seu traballo e colaboración”.
Burela celebrará unha festa de fin de ano na madrugada deste xoves, día 1 de xaneiro.
Está organizada polo Concello de Burela, que anuncia: “na noite de fin de ano despediremos o 2025 ao grande. De 00:30 a 05:30 bailaremos con Conxuro Discomóvil, que traerá os mellores éxitos de onte e de hoxe que recibamos o 2026 con festa e moita música. Ven á carpa da praza da Mariña para vivir un comezo de ano inesquecible en Burela!”.
A compañía Tarabela Creativa representará a obra titulada A Tarabela Ambulante: IDEA este martes, día 30 de decembro, en Burela. Será na Casa da Cultura ás 18:00 horas.
O Concello de Burela anuncia que é “un espectáculo gratuíto de Tarabela Creativa para público familiar”.
Agrupacións musicais da Sociedade Cultural Recreativa Ledicia, de Burela, actuarán na residencia de maiores que hai na localidade e na igrexa de Vila do Medio os días 23 e 26 de decembro, respectivamente.
“Mantendo as nosas tradicións de Nadal, o grupo infantil de Ledicia visitará a residencia de maiores o martes 23 ás 18:00 horas, para agasallar aos residentes con Cantos de Nadal, e o grupo de música ao completo (infantil e sénior), ofrecerá un breve concerto de panxoliñas na igrexa de Vila do Medio o venres 26 despois da misa”, anuncia a SCR Ledicia.
Este venres, día 19 de decembro, ás 21:00 h, a Casa da Cultura de Burela acolle a representación da obra Marina Club, unha proposta teatral para adultos da man do grupo A Adala. “Unha cita co teatro en Burela para compartir cultura”, anuncia o Concello.
Esta actividade é unha iniciativa do Concello de Burela en colaboración coa Vicepresidencia da Deputación de Lugo dentro do ciclo de teatro afeccionado.
Este xoves, día 18 de decembro, o Concello de Burela celebra o Día Internacional do Migrante coa proxección da película Fátima e un coloquio posterior na Aula Multiusos da Casa da Cultura. Será de 19:00 a 21:00 horas.
O Concello de Burela anuncia que esta actividade será “un encontro pensado como espazo de diálogo e reflexión, dirixido a tódalas comunidades que convivimos na vila para compartir experiencias, miradas e realidades diversas”.
O Concello de Burela anuncia que a chegada das datas de Nadal trae consigo un calendario cheo de propostas que combina cultura e celebracións abertas á veciñanza en Burela.
O primeiro encontro terá lugar este sábado, 13 de decembro, na praia da Marosa, onde o Burela Surf Club convoca unha actividade aberta a partir das 16:30 horas. Haberá unha pequena sesión de surf con gorro de Papá Noel acompañada de chocolate quente, unha proposta gratuíta á que pode sumarse calquera persoa, aínda que non practique surf.
O mércores 17 ás 20:00 horas o Auditorio Municipal acollerá o Concerto de Nadal da Escola de Música de Burela e o 19 de decembro ás 21:00 horas o Grupo de Teatro A Adala porá en escena o espectáculo para adultos Marina Club. O día 20 celebraranse o Concerto de Panxoliñas da Coral Polifónica de Burela e...
leer más
Este venres, día 12 de decembro, o grupo humorístico Trípode representará en Burela a obra titulada A presa. Será ás 21:00 horas na Casa da Cultura con entrada de balde.
“Estaremos en Burela, despois dun tempo sen acudir. Convidados polo Concello e dentro dos Circuítos de Teatro Afeccionado da Deputación Provincial de Lugo, representaremos a nosa última obra, A presa, que fala diso, dunha presa, pero tamén dunha forma de vivir e de entender a vida”, anuncia o grupo Trípode.
A Asociación Deportiva de Sendeirismo Pasada das Cabras, de Burela, fará unha ruta desde A Fonsagrada a San Pedro de Neiro este sábado, día 13 de decembro. O prezo é de 30 euros para os socios do colectivo organizador e de 40 euros para os que non o son. Inclúe autobús, comida e seguro. A saída será ás 08:30 horas desde a estación de autobuses de Burela.
É unha ruta de dificultade baixa, con 8 quilómetros de percorrido. A organización recomenda levar bastón e calzado apropiado.
As persoas que queiran participar deben anotarse antes do xoves 11 de decembro.
O Concello de Burela anuncia a celebración do espectáculo de ballet Romeo y Julieta, que terá lugar o venres 26 de decembro ás 20:00 horas na Casa da Cultura de Burela. O espectáculo, baseado na obra de William Shakespeare e coa composición musical de Serguéi Serguéyevich Prokófiev, forma parte da xira por España presentada por Leonor Gago.
“A peza traslada ao escenario a coñecida historia ambientada na antiga Verona, onde a rivalidade entre as familias Capuleto e Montesco condiciona o amor de dous mozos. O ballet percorre momentos clave como o primeiro encontro nun baile, o matrimonio secreto, o dó, o desterro ou o intento de fuga, nunha trama que avanza cara ao seu desenlace tráxico. A obra preséntase como un himno á xuventude e unha reflexión sobre o poder do amor fronte ao odio”, explica o Concello de Burela.
... leer más