Mondoñedo celebrará a Festa da Árbore este sábado, 13 de abril. Esta actividade, que se vén realizando na cidade mindoniense desde o ano 1569, está organizada nesta ocasión pola asociación cultural O Pasatempo e será no xardín da escola infantil A Galiña Azul.
As actividades comezarán ás 12:00 horas con xogos cooperativos e talleres infantís. Ás 13:15 horas farase unha plantación de árbores e haberá un recital de poemas con acompañamento musical. A continuación entregarán os premios do XII Concurso da Árbore. Os debuxos participantes neste certame estarán expostos durante a festa.