A sede da Delegación Territorial da Xunta en Lugo acolle durante as próximas –ata o día 29- e dende onte, unha exposición colectiva coa obra de nove artistas vinculadas á Mariña. As autoras participantes son Cristina Basanta, Lucía Catuxo, Zilí Katova, Renata Otero, Alicia Puchades, Pilar Rei, Eva Rivas, Laly Santos e Lucía Vila.
A exposición Ser visibles. Escoitar imaxes, retratar palabras, tivo o seu xerme o pasado mes de abril na Semana das artes plásticas da Mariña celebrada no Cenima de Foz, e trasládase agora á capital para “continuar reivindicando o traballo destas artistas”, segundo afirmou o delegado territorial.
Balseiro incidiu na necesidade de “estender a visibilidade da muller en todos os campos de actividade, entre eles como creadora e como motor das industrias culturais de Galicia”.
A mostra está integrada por pinturas, collages e cerámica, con variedade de materiais, elaboración, inspiración e estilos, “o que a converte nun espello do talento e da diversidade da expresión artística que ofrece A Mariña”.
A exposición permanecerá no edificio administrativo da Xunta en Lugo e pode ser visitada en horario de mañá e tarde de luns a venres, e os sábados pola mañá.