O XIII Torneo Infantil de Fútbol da SD Ribadeo celebrarase os días 21 e 22 de maio. Participarán 400 nenos de 21 equipos de Asturias, Cantabria e Galicia.

Os días 21 e 22 de maio disputarase en Ribadeo o XIII Torneo Infantil da SD Ribadeo, que reunirá a 400 nenos de 21 equipos de Galicia, Asturias e Cantabria. O evento foi presentado esta mañá no salón de plenos do Concello. No acto interviñeron o xefe territorial de Deportes, Manuel Otero, a presidenta da SD Ribadeo, Sandra Nonide, o concelleiro de Deportes ribadense, Jorge Díaz, o xerente de Acisa, Jesús Pérez, e o técnico municipal de Deportes, Iván Rodríguez. 

Manuel Otero tivo palabras de agradecemento para os equipos e clubs participantes e tamén para as firmas colaboradoras e para os patrocinadores: “en especial para o Concello de Ribadeo por esa forte aposta lúdico deportiva que desenvolve ao longo dos 365 días de cada ano. E noraboa á SD Ribadeo por converter un torneo, que xa é todo un referente non so no ámbito provincial e autonómico senón tamén no estatal”.

O xefe territorial dixo que “a situación ocasionada polo covid é a que é e imos pedirlle a toda esa xente que virá disfrutar de Ribadeo, da Mariña e do Occidente asturiano que o fagan con máis sentidiño e con máis cabeza ca nunca. E aos deportistas dicirlles que veñan disfrutar do deporte, do fútbol, con ánimo de gañar, pero que nos demostren que tamén saben perder. Iso ás veces é o mais importante no deporte e sobre todo nestas idades. Agardamos que o torneo sexa todo un éxito”.

A presidenta da SD Ribadeo, Sandra Nonide, manifestou que “estamos moi ledos porque por fin este ano podemos volver á normalidade e volveremos disfrutar da festa do fútbol para terminar con bo pe a tempada”. E subliñou que “no XIII Torneo Infantil, que se vai celebrar esta vindeira fin de semana contamos con 21 equipos de Galicia, Asturias e Cantabria. En total nos tres torneos que organizamos van ser 2.000 nenos e os seus familiares os que lles darán un bo empurrón aos negocios da nosa vila”. Nonide agradeceu o apoio e a colaboración do Concello de Ribadeo, da Xunta de Galicia e de Acisa.

O concelleiro de Deportes, Jorge Díaz, sinalou que “iniciamos a celebración dos torneos organizados pola SD Ribadeo esta fin de semana co infantil. Queremos amosarlle o noso apoio á SD durante todo o ano con toda a súa actividade. E reiterar as palabras dos meus antecesores, de Manolo e de Sandra, queremos que se compita ben, se gañe ou se perda que se saiban facer ben as dúas cousas, con moita cautela porque vimos do que vimos, que procuren ser sensatos en todo e que actúen con orde tanto por parte dos pais e das nais, que sabemos que así o van facer, como dos equipos”. E engadiu: “o Concello, dentro das dúas posibilidades, vai seguir apoiando este tipo de iniciativas e de deporte base, que cremos e consideramos que é o futuro e aí estaremos para seguir”. Díaz Freije agradeceu o apoio da Xunta de Galicia. 

E o xerente de Acisa, Jesús Pérez, manifestou: “por parte de Acisa agradecerlle á SD Ribadeo a organización destes torneos, que son moi importantes. Estamos a falar dunha cantidade en total de 2.000 pícaros coas súas familias, equipos e demais e estamos seguros de que vai ser un evento que vai atraer a moita xente á nosa vila. Seguramente serán miles as persoas que se acheguen a Ribadeo durante tres fins de semana e desde Acisa tiñamos a obriga de colaborar cunha importante achega económica e facémolo de boa gana porque os visitantes convértense en pequenos embaixadores para dar a coñecer Ribadeo noutras partes de Galicia, de Asturias e de Cantabria”.