O vindeiro 8 de xuño celébrase o Día Mundial dos Océanos. Gaia e Concello programaron para os vindeiros días a limpeza de varias zonas costeiras e praias de Burela “para concienciar á poboación do papel crucial que desempeña o mar nas nosas vidas”.
Desde Galicia lembran que “o día mundial dos océanos foi proposto por primeira vez no ano 1992 no cumio da terra celebrado Río de Xaneiro. O obxectivo é crear conciencia sobre o papel crucial que os océanos desempeñan nas nosas vidas e as distintas maneiras con que as persoas poden axudar a protexelos.Os océanos axudan a regular o clima e o tempo e proporcionan osíxeno e alimentos, así como outros efectos beneficiosos para o medio ambiente e para a sociedade e a economía en xeral”.
As monitoras do Centro de Educación Ambiental Gaia sinalan: “calcúlase que cada ano 6,4 millóns de toneladas de residuos rematan no mar e posteriormente nas praias. Entre o 60% e o 80% son plásticos (bolsas, envases e latas). Estes residuos poden ser consumidos por seres vivos na base da cadea alimentaria. Os plásticos son confundidos como alimento dos paxaros, peixes, tartarugas e mamíferos mariños (baleas ou os delfíns). O PNUMA estima que esta contaminación mata cada ano a máis de un millón de aves e a uns cen mil mamíferos mariños”.
As monitoras do Centro de Educación Gaia do Concello de Burela, empezaron a celebrar esta efeméride, o Día Mundial dos Océanos, no ano 2010 e durante todos estes anos esta iniciativa levouse a cabo de forma continuada. A actividade consiste na limpeza e recollida dos diferentes residuos que aparecen tirados nas praias tales como envases de plástico (latas, botellas, bolsas), pneumáticos, redes, cordas…
Ao longo de todo o mes de xuño, coincidindo coa marea baixa, levaranse a cabo distintas limpezas de zonas costeiras (no porto, no Perdouro) e praias nas de O Portelo e do Cabaliño.
Nesta iniciativa participan alumnado do IES Perdouro, que levará a cabo a limpeza o día 18 de xuño da zona do Perdouro, e varias asociacións da localidade: a Fundación Eu Son fará esta labor o 29 de xuño, a Asociación Camiña participará nunha limpeza o día 11 de xuño, a Asociación A Mariña fará limpeza o 16 de xuño e a ANPA Ceip Virxe do Carme acudirá a facer tarefas de limpeza o 12 de xuño.
Cada participante recibirá material relacionado coa reciclaxe de Sogama e merchandising de Gadisa.