Música
O Círculo Habanero da Devesa, no municipio de Ribadeo, acollerá este venres, día 15 de maio, ás 20:30 horas un concerto das cantautoras Eva Rosado e Celia Pía. O prezo da entrada é de 10 euros.
É un evento organizado pola Asociación Cultural A Tribo da Travesía, que explica: “dúas cantautoras do Norte, de Ortegal e do Occidente Asturiano. Eva Rosado, de Castropol, abre con catro temas. Ela compón desde unha parte íntima e intuitiva construíndo cancións "a ratos" cunha guitarra antiga e baixo a crenza que a música traza pontes e une almas.
Logo Celia Pía acompañada de Xavier Melgar (a Buguina Terraquea) ofrece un concerto con temas do seu ultimo disco, Estado Natural, que podedes escoitar en todas as plataformas. As súas cancións son reflexo da súa experiencia vital liberando na composición o que lle...
leer más
Este sábado, día 9 de maio, ás 21:00 horas haberá Guateque de Arruguiñas no Local Social de Lieiro. Estará amenizado polo dúo Mar da Vila.
“Unha noite para bailar, lembrar e gozar en boa compañía”, anuncia o Concello de Cervo, que organiza esta actividade en colaboración coa Asociación de Veciños Nosa Señora de Lieiro.
Para conmemorar o Día das Letras Galegas o grupo musical focego Son´s Varadero ofrecerá un concerto este sábado, día 9 de maio, ás 20:00 horas na casa da Cultura de Foz.
Son´s Varadero fará unha actuación cun repertorio de cancións galegas e anuncia que este concerto estará dedicado ao focego Xesús do Breogán “pola súa contribución e dedicación á cultura do noso concello”.
Este evento está organizado por Son´s Varadero coa colaboración do Concello de Foz.
O Colectivo Pensamento e Sementeira organiza a terceira edición da súa Foliada do Maio, que se celebrará este sábado, día 9 de maio, na Escola Vella de Galdo, no municipio de Viveiro.
A xornada comezará ás 18:00 horas co obradoiro de baile TradInclusivo, impartido por Cris Canosa. “Un espazo aberto a todas as persoas que queiran iniciarse no baile tradicional, cun enfoque inclusivo e accesible, pensado para garantir a participación de persoas con diversidade funcional. É unha actividade gratuíta con prazas limitadas”, anuncia Pensamento e Sementeira, que engade: “despois do obradoiro... chega a festa! Poñeremos en práctica o aprendido nos concertos da foliada. Nesta edición contaremos cos seguintes grupos: Pandeireteiras da Sementeira, Xaora, A Requinta de Lampai e Lina e Lola. E cando rematen os concertos… foliada aberta!”.
Foz acollerá este sábado, día 2 de maio, un concerto a beneficio da Asociación Española Contra o Cancro. Será na Sala Bahía ás 19:00 horas.
Neste concerto solidario, organizado polo Concello de Foz, actuarán os grupos locais Toxo Guayaba, Mar Aberto e Rondalla Latexos.
O importe do donativo para os asistentes é 5 euros.
O Vendaval Fest organiza o VIII Concerto do Galiñeiro no Cine Teatro de Ribadeo este venres, día 1 de maio, ás 22:00 horas coas actuacións dos grupos Sigilu e Beach Avenue.
Os promotores deste evento anuncian: “o vindeiro 1 de maio viviremos no Cine Teatro de Ribadeo unha noite chea de grunge e rock alternativo” e explican que o grupo Sigilu “nace en Lugo en 2015 cunha idea clara: mesturar o acústico e o electrónico sen límites. En 2017 lanzan o seu primeiro traballo, fusionando folk, electrónica e matices trip-hop, marcando o inicio do seu universo musical. En 2025 lanzan o seu segundo álbum, máis denso e expansivo, que conecta o rock progresivo, o metal e o alternativo dos noventa, con ecos da música española clásica. Influencias como Tool, Steven Wilson, Alice in Chains ou Radiohead marcan o seu son”. E Beach Avenue “nace en Lugo en...
leer más
O 26 de abril segue o Domingueo en Ribadeo, que organizan o Concello e Acisa. Este vindeiro domingo Sintético Fantástico actuará no lugar coñecido como Catro Calles a partir das 13 horas para animar o mediodía nesa zona do centro da vila ribadense.
O Domingueo en Ribadeo continuará os días 3 e 31 de maio e 7 e 14 de xuño por diferentes localizacións.
Desde o Concello ribadense e desde Acisa animan “ás veciñas e aos veciños de toda a contorna a achegarse a Ribadeo a gozar de todas as propostas que aquí van atopar os domingos, ou calquera outra xornada. Co bo tempo a programación de actividades na rúa increméntase, os días son grandes e toca aproveitalos ao máximo”.
A XXI edición do Resurrection Fest, de Viveiro, que se celebrará do 1 ao 4 de xullo neste municipio mariñán, contará un ano máis cun patrocinio da Deputación de Lugo de 150.000 euros. Así o anunciou a deputada provincial Pilar García Porto, tras a reunión da Xunta de Goberno deste venres e detallou: “demos luz verde a este contrato de patrocinio para apoiar un festival consolidado como un dos grandes referentes internacionais no ámbito do rock e do metal”.
Valorou García Porto que “cada ano, desfrutan deste evento milleiros de persoas chegados de diferentes puntos de España e do estranxeiro, polo que o Resu contribúe a situar a nosa provincia no circuíto dos grandes eventos musicais”. Nese sentido recalcou que a institución provincial colabora “ano tras ano porque apoiando este tipo de iniciativas estamos apoiando a economía local, xerando...
leer más
A Igrexa Parroquial de Santa María de Burela acolleu este pasado xoves, 16 de abril, un concerto a cargo da orquestra e coro do Conservatorio Superior de Música da Coruña, nunha actuación realizada en colaboración coa Escola Municipal de Música de Burela. Esta actuación forma parte dunha proposta cultural que terá continuidade o xoves 23 de abril coa actuación da Orquestra de Metais do Conservatorio Superior de Música da Coruña. O evento será no Auditorio Municipal de Burela ás 18:00 horas.
O primeiro tenente de alcaldesa, Mario Pillado, animou á veciñanza a asistir a este segundo concerto, que “permitirá seguir gozando da música en directo de alto nivel en Burela”.
Este sábado, día 18 de abril, a Igrexa de San Francisco, de Viveiro acollerá “unha cita musical imprescindible coa participación de tres agrupacións corais. Unha tarde para gozar do talento e da polifonía en directo a partir das 20:30 horas”, anuncia o Concello de Viveiro. Actuarán a Coral do Centro Social Sagrada Familia (A Coruña), a Coral Polifónica de Piloño (Vila de Cruces) e o Coro de Adultos do Conservatorio de Viveiro.
É un evento organizado pola Asociación de Adultos Melomanía e o Conservatorio Profesional de Música de Viveiro, coa colaboración do Concello.