Teatro
O Grupo Humorístico Trípode representará a súa obra titulada A presa en Celeiro de Mariñaos, parroquia do concello de Barreiros, o día 18 de xaneiro, sábado.
Trípode Teatro anuncia: “convidados pola Asociación de Veciños de Celeiro de Mariñaos, visitaremos esta fermosa parroquia o vindeiro sábado 18 do presente mes de xaneiro para representar a nosa última obra, A presa. Será polas 20:00 horas no antiga escola da parroquia. Alí estaremos unha vez máis Melisa e Pitágoras, Pepita e Formigón, Amancio e Balbina, Greta e Bonifacio e a francesa Françoise, xunto coa nosa técnica de son Rocío. Pasaremos unha fermosa tarde de teatro en compañía de amigos. Unha boa maneira de pasalo ben xuntos. Grazas á Asociación de Veciños de Celeiro de Mariñaos por convidarnos”.
O Concello de Cervo organiza unha viaxe para asistir a unha representación do Centro Dramático Galego en Santiago o día 17 de xaneiro, venres. Esta actividade forma parte da iniciativa Sobes ao autobús do teatro? Programa de mobilidade do Centro Dramático Galego.
O autobús sairá da Casa do Mar de San Ciprián ás 14:00 horas, a función será ás 18:00 e a hora prevista para a saída desde Santiago é ás 20:00. O prezo da entrada é de 5 euros.
O Concello de Cervo anuncia: “lembrade que tedes que anotarvos para ir e podedes facelo chamando á Casa da Cultura (teléfono 982.59.51.57)”.
O humorista Roberto Vilar, natural do municipio de Xove, empezará en Viveiro a xira do seu novo espectáculo, titulado Continueixon, o día 25 de xaneiro, sábado. Será no Teatro Pastor Díaz ás 21:00 horas.
O novo show de Roberto Vilar para volver a xirar polos teatros galegos chega despois do éxito conseguido con Celebreixon. Continuexion é unha volta máis a ese show inicial onde as sorpresas e a música foron os protagonistas desta xira, sen esquecernos da comedia e do humor tan característico do protagonista, Roberto Vilar.
O mago Henriko ofrecerá o seu espectáculo de maxia infantil en Cervo o martes 7 de xaneiro. Será ás 18:30 horas na carpa instalada na Praza do Souto.
É unha actividade incluída na programación de Nadal do Concello de Cervo en colaboración coa asociación cultural Airiños do Xunco.
Este sábado, día 4 de xaneiro de 2025, Trabada contará cunha nova actuación teatral. A Casa da Cultura acolle a partir das 21:00 horas a obra titulada "Pan con chocolate", interpretada polo grupo de teatro do Colectivo Cultural Ollomao, de Barreiros.
O grupo humorístico Trípode representará a obra titulada A Presa en Ribadeo este sábado, día 4 de xaneiro. Será ás 19:00 horas no centro de ensino Pedro Murias, na parroquia ribadense de Vilaframil.
Trípode anuncia: “volvemos aos escenarios outro sábado máis. Desta volta, convidados polo Concello de Ribadeo, estaremos no colexio Pedro Murias, de Vilaframil, o día 4 de xaneiro polas 19:00 horas. Outra volta a pelexar pola nosa aldea, pola nosa contorna natural, pola nosa vida. Outra vez a discutir sobre o eterno dilema da tradición e a modernidade, outra vez a facer teatro e a divertirnos. Agardamos por vós, para pasar un agradable rato xuntos”.
O musical Tadeo Jones, la tabla esmeralda representarase en Ribadeo este venres, día 3 de xaneiro. Será ás 17:00 horas no auditorio municipal Hernán Naval.
A empresa promotora deste espectáculo, Ace Pro Entertainment, anuncia: “llega Tadeo Jones, el musical. El personaje de animación más importante de la historia del cine español se hace realidad para que puedas disfrutar de sus aventuras en carne y hueso en el único musical oficial del mundo”.
O Concello de Cervo anuncia que o luns 30 de decembro “será máxico con Kiko Pastur. Ás 19:00 horas, na carpa instalada na Praza do Souto”.
É unha actividade incluída na programación de Nadal do Concello de Cervo, que conta coa colaboración da asociación Airiños do Xunco.
O Concello do Valadouro anuncia a representación do espectáculo titulado Monstrólogo, de Trécola Producións, que é unha “comedia teatral con monicreques e moita risa. Unha gran eminencia no campo da monstroloxía anda de xira por Galicia para darmos a coñecer tipos, habilidades e curiosidades dos monstros. Sentímolos debaixo da cama, no fondo do pasillo, na auga da piscina ou na casa vella, pero se nos achegamos a mirar... Zas! Desaparecen! Iso é porque cando imos cara ao medo, este escapa e vaise”. Será o luns 30 de decembro ás 17:30 horas na Casa da Cultura.
É unha representación para público infantil e familiar e despois da función haberá pintacaras para as persoas asistentes.
Burela acolle o novo espectáculo dos Bolechas, titulado Cantares de Reis, na Casa da Cultura. Será o luns 30 de decembro ás 18:00 horas.
Está dirixido a un público familiar e a entrada é de balde.